http://fancy.to/84csu0

احلى سلام الى احلى عرب في الدنيا من احلى و اروع منتدى للعرب في العالم
ان كانت هذه اول زيارة لكم فتفضلوا لتسجبل او الدخول مباشرة الى حسابكم
مع تحيات رئيس المنتدى

http://fancy.to/84csu0


    انا والحاسوب؟؟؟ (1)

    شاطر

    AZIZ MARZOUKI
    Admin

    عدد المساهمات : 906
    نقاط : 2749
    السٌّمعَة : 0
    تاريخ التسجيل : 09/07/2012
    العمر : 29
    الموقع : RADES

    انا والحاسوب؟؟؟ (1)

    مُساهمة  AZIZ MARZOUKI في السبت مارس 23, 2013 12:36 pm

    انا والحاسوب
    حكايتي اليوم ...حكاية طويلة ..ما لقيتلها حتى حيلة ..مع حاسوبي بتها ليلة ..تقول نعزق في البصيلة ..اتحبوا تعرفوا اش سار؟ ايا تبعوني يا حضار ..
    حاسوبي البارح معاركني .. عمل في عمايل زرقة ..فركته ورقة ورقة ..حرقلي عصابي يعطيه حرقة .. حمصني و لاهو في الحمصة مشاركني.
    يا اوخياني بهذل بحالي ..يمرد ..يزحف بالتوالي ..وانا انبرح كالشوالي ..لاحس بحرقتي ولا غاظه مالي ..تقولش عليه علي متعالي ..وانا لااهل ولا والي ..نتسنى فيه يشاطبني .
    قاعد يمشي دبة دبة ..وانا فيه السبة بسبة .. مرة ندعيله بالهداية ..يقدم خطوة .. يتكب كبة ..سيدي القاضي يا شكاية . اش ولى ثقيل ...تقول بهيم على ظهره زنبيل ..متعدي في بومنديل ..شاهي بكراعه يعفسني .
    كان واحد من خلان ..في لحظة ضرب فران .. شعل ناري ..تفريس وزاد فرعساته صغاري ..والا ضرباته عينين جاري ..صبح يزوك كالبقاري..كان كي السبعة الديناري ..ولى موجيرة ذبان .
    ملا بيعة وملا حالة ؟قالولي فورماتيه ..وفش غيظك فيه ..وامحيه على جد والديه ..مادام الدوخة لعبت عليه ..يا الله توكل بيه ..ولايهمك فيه ..تو يسترجل ينسى اللي فيه ..قلت هذا اللي بيه ..امالة يلزمني فاس وبالة .
    باش انورقه ورقة ورقة ..طلعلي شاشة زرقة..يا اراه محروق الف حرقة وحرقة ..بايت ليلي انفارع فيه ..اندوح بيه تقولش رضيع ونفطم فيه .. هاني بديت انفرك فيه ..هذا الديسك دير ..قالوا هو المدير ..فيه العقول اتحير ..غارق اظلم كيف البير ..داموس في بحر طبرقة .
    هالسوري قعد يدور ..تقول مرسكي في بابور ..وعيني ماشافت نور..هاو يدور هاو يدور كي الجادور .. مكبش كي محراث بوقلبة وراء تراكتور ..يا اوخي ديماري ..بجاه ربي ديماري ..الواش شعلت ناري ؟ الواه عطلت افكاري ؟ الواه طفيت انواري ؟ تي اش اللي بيك ؟ ما اتقليش زدت عليك ..وزنبيلك تعبى باسراري ؟ وكان هذا اللي بيك ؟..امالة توا اتشوف افاري ..
    قعدت نتسنى كالولية ..بجاه سيدي محرز والسيدة المنوبية ..فك علي ..تي سيب صالح ..لاني نهضة ولاني نداء ولاني حتى بن غربية ..خوك مواطن بسيط ..ديمة نمشي جنب الحيط ..ولا نفهم في البوليتيك ..اما بديت انطش طشان خفيف تبديل جو وشوية كيف ..وساعات انفرك رمان ..هذاكة زمان وهذا زمان ..وخوك مانيش مطمان ..نتقل من مكان لمكان ..لاني سي فلان ولاني سي علان ..ولاني في مقام وطان . ظلي ديمة كالضيف خفيف ..اما راني بشوكي كالضربان ..ولا نعرف في الظلم ثنية .
    حسيت بحاسوبي فهمني ..وزاد عمل لسان وكلمني ..قلي فهمت روحك سي الشباب ؟ فجعني تقولش شفت ثعبان ..وهو قدامي بارك تقول بومة في الكيفان ..لافمهت هذا انس والا جان ؟ وزدت خفت ليضربني باكريموجان ..ولا لقيت بجنبي اشكون يطمني ..قتلو اش حال عليك ؟ كان تعرف اش دفعت فيك ؟ شطر ضلوعك من الامريكان والطليان ..وانت معنقر النيشان ..تقول ملك البوتسوان ..علمتك ..وكلتك ..شربتك ..من كل عصير الوان ..جاي توا باش اتعلمني ؟
    قلي عثت وعبثت فيها صحري وبري وبحري ..واتكدس فيها حشايش وخنافس وزيوان ..للي اتكونلي سرطان ..وماينفع معايا سلام ولا كلام ولا هزان ولانفضان ..يلا شوفلي طبيب اختصاصي فنان ..يداوي جراحي ياخرنان ..والا شوف غيري في الدكان ..ومن اليوم لاعاد اتكلمني .
    هزيتو وحطيتو وبدلت المكان ..الشيء النافع ربي يا اوخيان ..الظاهر طلع من الازلام وناوي ايخليني مدان ..ايا امالة في لامان ..ولاصيانة ولا شريان ..اليوم صبح خردة بعد ماكان.. تحفون ومزيان ..كبر واتدمدم ولى ذليل ومهان ..طلعلي الدم وزاد السكري في الميزان ..وفي اللخر ردني فتان ..يا ملا وحلة ..براد بلاش كيسان ..
    راهو بهذل بحالي ..لحظة ..لحظة هاو تقريب عمل مليح ..شد روحك يا صاليح ..هاو الضرب ولى صحيح ..الحاسوب بدا يصيح ..زعمة ناوي على الشطيح ؟ ..والا رجع للنبيح ؟ باهي هاني نتسنى في التوضيح ..ديماري ديماري تقولش كبش امتاع انطيح ..لحظات وارجع بالتوالي ..زايد ضاعت افاري وترزيت في مالي ..هالبيعة كي القرع الجالي ..ما يكسبه كان الزوالي ..اللي حالو كيما حالي ..نهار بيه زاهي ونهار منو يدعي ..يسب ..ويصيح.
    زايد كسكسلو رجع لاصلو..وناس بكري قالوا ضرسك اذا وجعك قلعو وبنتك اذا كبرت اعطيها وحاسوبك اذا اتفريس فصلو ونصلو...
    بخاطركم

      الوقت/التاريخ الآن هو الأحد يوليو 23, 2017 1:45 am